ბრაზილიაში პოკერი დღითიდღე უფრო პოპულარული ხდება. ეს არამხოლოდ ბრუნო პოლიტანოს ფინალურ მაგიდაზე მოხვედრითაა გამოწვეული. საქმე იმაშია, რომ პოკერს ორი საუკეთესო ბრაზილიელი უწევს პოპულარიზაციას - რონალდო და ნეიმარი, რომლებიც არამარტო ქვეყანაში, მთელ მსოფლიოში უდიდესი პოპულარობით სარგებლობენ. 

წელს კი, ნეიმარი, WSOP-ზე, ამაზონის ოთახში, დაცვითა და ფანებით გარშემორტყმული გამოჩნდა, მისი მეგობრის, ფილიპე რამოსის მხარდასაჭერად. ლეგენდარულმა ფეხბურთელმა მეგობარს წარმატებები უსურვა და ფანებთან სურათები გადაიღო. "იმის მიუხედავად, რომ ის შვებულებაშია, მან მაინც გამონახა დრო, რათა ჩემთვის წარმატებები ესურვა, - ამბობს რამოსი, - ეს ჩემთვის ძალიან ბევრს ნიშნავს."

ისეთი ფეხბურთელისთვის, როგორიც ნეიმარია, შეუძლებელია ხალხში გამოჩენა გამუდმებული კითხვების, ფოტოებისა და ავტოგრაფების გარეშე. ასე რომ მისი სერიებზე მოსვლა ნამდვილად განსაკუთრებული მოვლენაა. "ჩვენ ვიცით, როგორია მისი ცხოვრება. მისთვის ძალიან რთულია, უბრალოდ გარეთ გამოსვლა და გართობა, - თქვა რამოსმა, - ის არაჩვეულებრივი ადამიანია. მან სამი ჩემპიონატი მოიგო, გოლი გაიტანა ყველა მნიშვნელოვან შეხვედრაში, ერთ-ერთი საუკეთესო ფეხბურთელია. მაგრამ რაც უფრო მნიშვნელოვანია, ის გაცილებით უკეთესი პიროვნებაა. ამიტომაც ვარ ასეთი გახარებული. ის ჩემი უდიდესი მოტივატორია."

რამოსს არც რონალდოს წვლილი დავიწყებია - "რონალდო საუკეთესოა! ის ძალიან დაგვეხმარა ბრაზილიაში პოკერის დადებითი იმიჯის შექმნაში. ნეიმარი კი ჩემი მეგობარია. მან მითხრა, რომ ის უბრალოდ საყურებლადა და საგულშემატკივროდაა ჩამოსული და მთხოვა, რომ დიდი ყურადღება არ დამეთმო მისთვის და ჩემი საქმე გამეკეთებინა. ჩემპიონთა ლიგის ფინალის დროს მან დამირეკა და მითხრა: უნდა ჩამოხვიდე! შენ იღბალი მოგაქვს ჩემთვის. უარს ვერ ვეტყოდი, ჩავედი და თამაში მოიგეს კიდეც. მან ბოლო წუთზე გაიტანა. ახლა კი ჩემ დასახმარებლად და საგულშემატკივროდ ჩამოვიდა."

მიუხედავად იმისა, რომ ნეიმარმა ვეგასი დღეს დატოვა, რამოსის თქმით, თუ ის ფინალურ მაგიდაზე თამაშს შეძლებს, მეგობარი აუცილებლად დაესწრება მის თამაშს - "უკვე ყველაფერი ჩემზეა დამოკიდებული, თუ მე შევძლებ 'გოლის გატანას' მაშინ მას კიდევ ერთხელ მოუწევს ვეგასში დაბრუნება და 'ნოემბრის ცხრიანზე' დასწრება. ბრუნო პოლიტანოს თამაში 'ნოემბრის ცხრიანზე', მართლაც დიდი პროგრესი იყო ბრაზილიური პოკერისთვის. ამჟამად 6 ბრაზილიელი პროფესიონალი იბრძვის და თუ რომელიმე მოვახერხებთ ფინალურ მაგიდაზე მოხვედრას, ეს აშკარა მტკიცებულება იქნება იმისა, რომ ბრაზილიურ პოკერს დიდი მომავალი აქვს."