პარასკევს, Harra's Cherokee-ში დასრულდა World Series Of Poker National Championship-ის რიგით მეხუთე ყოველწლიური ტურნირი. ივენთზე 122 მოთამაშე ღებულობდა მონაწილეობას, რომლებიც საკმაოდ უცნაურად იყვნენ შერჩეულნი: 100 მათგანი, ტურნირზე, WSOP-ის გასულ სეზონზე მიღწეული წარმატების გამო მოხვდა, ხოლო დარჩენილი 22 ადგილი, $10.000 დოლარის სანაცვლოდ იქნა შევსებული. მთლიანობაში, პრაიზ პულმა $1.220.000 დოლარი შეადგინა. 

ლონი ჰარვუდმა, ფინალურ ორთაბრძოლაში, გასული WSOP-ის ყველაზე წარმატებული მოთამაშე ალექს მასეკი დაამარცხა და ტიტულის, $341.599 დოლარის და მისთვის მეორე ოქროს სამაჯურის მოპოვება შეძლო. 

2013 წელი, ლონი ჰარვუდისთვის, არნახულად წარმატებული აღმოჩნდა - მან 6-ჯერ მოახერხა WSOP-ზე ფულში შესვლა, 3 ივენთის ფინალურ მაგიდაზე ითამაშა, $1.500 დოლარიანი ულიმიტო ჰოლდემის ივენთის მოგება შეძლო, სადაც 2541 მოთამაშიანი ფილდი დაამარცხა და მთლიანობაში, $874.698 დოლარი გამოიმუშავა. 2014 წელს, მან, პოკერის სერიებზე დასწრება დედის ხანგრძლივი ავადმყოფობისა და გარდაცვალების გამო ვერ შეძლო. წლევანდელი სამაჯურიც, რა თქმა უნდა, მას მიუძღვნა. "მე მინდა მივმართო ჩემ ძმას, სკოტ ჰარვუდს, - თქვა გამარჯვებულმა, - ის ჩემი ერთ-ერთი საუკეთესო მეგობარია, ყოველთვის გვერდში მიდგას, როცა მჭირდება. მას დღეს აქ სურდა ყოფნა, მაგრამ სამსახურის გამო ვერ ჩამოვიდა. ვიცი, რომ ახლა ჩემ სატელეფონო ზარს ელოდება და ნერვიულობს." 

122 მოთამაშეს შორის, რომლებმაც წლევანდელ ივენთში მიიღეს მონაწილეობა, იყვნენ ისეთი სახეები, როგორებიც დენიელ ნეგრანუ, ფილ ჰელმუტი, ჯეფ მედსენი, ჯონ მონეტი, სკოტ კლიმენტსი და დომინიკ ნიცშე არიან. ნეგრანუსთან ერთად, დომინიკ ნიცშე ის მოთამაშე აღმოჩნდა, რომელმაც ფულში შესვლა მოახერხა. 

დენიელ ნეგრანუსგან კიდევ ერთ სამაჯურს მილიონობით თაყვანისმცემელი ელოდა, თუმცა კანადელი მეექვსე ადგილიდან გამოეთიშა ტურნირს. მან UTG-დან JJ-ით ოლ ინი გააკეთა, რაზეც 'კატოფზე' მყოფმა მასეკმა AQ-ით უპასუხა და T65KJ ბორდზე მოუგო კიდეც. უნდა აღინიშნოს, რომ ალექს მასეკმა, ფინალური დღე შორტ სტეკით დაიწყო, მაგრამ ძლიერი, აგრესიული თამაშითა და იღბალის დახმარებით, დიდი სტეკის დაგროვება შეძლო, თუმცა ჰარვუდთან ფინალურ ჰედს-აპზე დამარცხდა. "ეს ნამდვილად ის ოპონენტი იყო, რომელთანაც ჰედს-აპის თამაში ნამდვილად არ მინდოდა" - თქვა ტურნირის შემდეგ ჰარვუდმა. 

2015 წლის WSOP National Championship-ის ჩანაწერების ნახვა, მაყურებელს 18 აგვისტოდან შეეძლება, ESPN-ის ეთერში.