ძალიან ცოტა მოთამაშე თუ მოიძებნება, რომელიც იტყვის, რომ პოკერის ლაივ სესიაზე ახალი დარიგების ლოდინი და დროის გაწელვა, მისთვის, არანაირ პრობლემას არ წარმოადგენს. პოკერის პოპულარობის ზრდასთან ერთად, მისი სიჩქარეც იზრდებოდა, მაგრამ თამაშის უახლოეს ისტორიას ახსოვს ისეთებიც, ვინც ინტერნეტში თამაშისას 15 მაგიდაზე წამებში ღებულობდა გადაწყვეტილებას, ხოლო ცოცხალი თამაშის დროს ერთი გადაწყვეტილების მიღებას რამდენიმე წუთს უთმობდა. ამის გამო ხშირად გამოითქმებოდა პრეტენზიები. მოთამაშეს, რომელიც სხვის მიერ დროის გაყვანის გამო თავს 'დაზარალებულად' თვლიდა, ტურნირის მენეჯერთან ამ ფაქტის გასაჩივრება შეეძლო, რომელიც თავის მხრივ, დროის არასათანადოდ გამოყენებაში ბრალდებულ დარიგების მონაწილეს ზუსტად ერთ წუთს აძლევდა, რის შემდეგაც მისი ხელი 'გადაყრილად' ჩაითვლებოდა. ამ უხერხული პრაქტიკის თავიდან ასაცილებლად, ლას ვეგასის დიდ ტურნირებზე, სპეციალური წესი მიიღეს, რომლის მიხედვითაც, ყოველ მოთამაშეს წინასწარ განსაზღვრული რამდენიმე წამი ეძლევა. დრო, ე.წ. 'ტაიმ ბანკი' კონკრეტული ტურნირის ორგანიზატორებზეა დამოკიდებული, მაგრამ როგორც წესი, ის 20-დან 30 წამამდე გრძელდება. 

ლაივ თამაშებისგან განსხვავებით, ონლაინ პოკერში, იგივე პრობლემა ფაქტიურად არ არსებობს. ამის ნაცვლად, მოთამაშეებმა შეიძლება საყვედური იმასთან დაკავშირებით გამოთქვან, რომ პოკერის ონლაინ ოპერატორები, მათ, არასაკმარის დროს აძლევენ. თუმცა გამოიძებნა ისეთი ადამიანიც, რომელიც პირიქით, ონლაინ თამაშებში დროის შეზღუდვის მომხრეა. ის, 2014 წლის WSOP-ის მეინ ივენთის გამარჯვებული, მარტინ ჯეიკობსონია. 

როგორც თავის 'ტვიტერის' გვერდზე, 2014 წლის მსოფლიო ჩემპიონი წერს, დროა ონლაინ პოკერი კიდევ უფრო აჩქარდეს და ყოველ მოთამაშეს 5 წამი ჰქონდეს, სანამ პირადი 'ტაიმ ბანკის' გამოყენებას შეძლებს. მარტინ ჯეიკობსონი, პოკერის ისტორიაში, ერთ-ერთ საუკეთესო მოთამაშედ ითვლება, ვინც WSOP-ის მეინ ივენთის მოგება შეძლო. მისი კარიერული მოგება $15 მილიონ დოლარს აღემატება. მსოფლიოს მასშტაბით, ჯეიკობსონი, რიგით მე-13 ყველაზე წარმატებული ტურნირების მოთამაშეა. ამ მხრივ, შვედეთში, ის პირველ ადგილს, ხოლო ევროპაში, სემ ტრიკეტის შემდეგ, მეორე ადგილს იკავებს. ცხადია, მის სიტყვას, პოკერის სამყაროში, საკმაო გავლენა აქვს და ასეთი წინადადება განხილვის საგანი გახდება.