ჩინეთსა და აღმოსავლეთ აზიის ქვეყნებში პოკერის ბუმი სულ უფრო დიდ მასშტაბებს იძენს. შესაბამისად, ჩინური ონლაინ პოკერის ოპერატორი Tencent Poker მაქსიმალურად ცდილობს თავისი გავლენის სფეროების გაფართოებასა და აღმოსავლეთ ბაზრისთვის PokerStars-ის დონის მომსახურების შეთავაზებას. Tencent Poker-ის უკანასკნელი დიდი 'ნადავლი' 2014 წლის WSOP-ის მეინ ივენთის გამარჯვებული, მარტინ ჯეიკობსონი გახდა, რომელიც თანამედროვეობის ერთ-ერთ საუკეთესო მოთამაშედ ითვლება. 

"თავდაპირველად, ჩემთან Tencent Poker-ის ერთ-ერთი მაღალი რანგის წარმომადგენელი მოვიდა და პოკერ-რუმის მიერ გასამართი შოუს გაძღოლა მთხოვა. მაშინ მე მხოლოდ მიწვეული სტუმარი ვიყავი. ეს საკმაოდ უცნაური გამოცდილება იყო, როგორც ჩემთვის, ასევე მათთვის - მე არასდროს წამიყვანია რომელიმე შოუ, ხოლო მათი პოკერ-რუმის სახელით არასდროს გამოსულა რომელიმე მსოფლიო ჩემპიონი." მარტინ ჯეიკობსონს, ჩანგშას აეროპორტში, უამრავი გულშემატკივარი და პოკერის მოყვარული დახვდა, რაც სათამაშო ინდუსტრიაში საკმაოდ იშვიათი მოვლენაა. "მოგვიანებით გავიგე, რომ აეროპორტში მოსულ ერთ-ერთ გულშემატკივარს რამდენიმე საათი მანქანით მგზავრობა დასჭირდა იმისთვის, რომ ჩემთვის ხელი ჩამოერთვა. ისინი მთოხვდნენ ავტოგრაფებს - ზოგი კარტზე მთხოვდა ხელის მოწერას, ზოგი პირდაპირ შიშველ სხეულზე. მსგავსი რამ არასდროს მინახავს" - ამბობს ჯეიკობსონი. 

როგორც Global Poker Index-ის აღმასრულებელი დირექტორი, ალექს დრეიფუსი ამბობს, ჩინეთი პოკერის ახალი ბუმის სამშობლო იქნება, რის შემდეგაც პოკერი მთელ აზიას მოედება. 

ჯეიკობსონი, ასევე, გამოეხმაურა 2015 წლის WSOP-ის მეინ ივენთის გამარჯვებულის, ჯო მაკკიენის მოსაზრებას - "სოციალური მედია ძლიერი იარაღია. შენი ნებისმიერი წინადადება შეიძლება საზოგადოებამ არასწორად გაიგოს და მილიონი სხვადასხვა ინტერპრეტაცია მიეცეს. ამიტომაც, თუ რამის გამოქვეყნებას გადავწყვეტ, რამდენჯერმე ვამოწმებ და მხოლოდ ამის შემდეგ ვწერ. ჯო მაკკიენს რაც შეეხება, ეს მისი მოსაზრებაა და მას ყველანაირი უფლება აქვს იფიქროს ისე, როგორც თავად თვლის მიზანშეწონილად." შეგახსენებთ, რომ ჯო მაკკიენის განცხადებით, WSOP-ის მენეჯმენტი, მოთამაშეებს, მონებივით ექცევა. მისი ამ განცხადების საფუძველი ის ფაქტი გახდა, რომ WSOP-ის 2016 წლის სერიებზე, ივენთების უმეტესობა საღამოს 11 საათზე იწყება.