სანამ პოკერის მსოფლიო ჩემპიონები თავიანთი საქმეებით არიან დაკავებულები, 2015 წლის WSOP Main Event-ის გამარჯვებული - ჯო მაკკიენი მასშტაბურ ტურნირებზე იბრძვის. 17 მაისს გამართული $1.100 დოლარიანი Parx Big Stax-ის პირველი ადგილისთვის, ამერიკელმა პროფესიონალმა $106.126 დოლარი მოიგო.

უკანასკნელი ორი თვის განმავლობაში, მაკკიენმა კიდევ ორჯერ მოახერხა ექვსნიშნა თანხის მოგება: მან ჯერ Borgata Spring Poker Open Championship-ის მე-3 ადგილისთვის - 138.104 დოლარი, ხოლო შემდეგ Seminole Hard Rock Poker Showdown-ის $2.200-იანი ივენთის პირველი ადგილისთვის $104.608 დოლარი მიიღო.

Parx BIg Stax-ის $1.100-იან ტურნირზე 447 მოთამაშე დარეგისტრირდა, საიდანაც ფულში შესვლა 53 მათგანმა შეძლო. ფინალური დღე მაკკიენმა 100 ბიგ ბლაინდიანი სტეკით დაიწყო. მისი ჩიპლიდი კიდევ უფრო გაიზარდა, როდესაც AK-ით ორი მოწინააღმდეგის - QQ-ისა და AQ-ის გაგდება შეძლო. ამის შემდეგ, უკვე ფინალურ მაგიდაზე, მაკკიენმა ორჯერ გაიბრძოლა AK-ით და ორივეჯერ წარმატებულად: მან ჯერ AQ-ით შეიარაღებული მაიკლ მერფის შეუტია და მოიგო, ხოლო შემდეგ AK-ით ბარტ გოლიკის KK დაამარცხა. 

ამის შემდეგ, მაკკიენმა ანდერდოგებით დაიწყო თამაში და ამჯერადაც წარმატებულად: მან AT-ით რაიან პოჩედლის AQ-ის რივერზე დადებული T-ის წყალობით აჯობა. ტრევის გრინვოლტსა და ჯო მაკკიენს შორის გამართული ჰედს-აპი საკმაოდ ხანგრძლივ თამაშს მოასწავებდა: გრინვოლტის სტეკი100 ბიგ ბლაინდს, ხოლო მაკკიენის 250 ბიგ ბლაინდს შეადგენდა. ორთაბრძოლის პირველი ნაწილი გრინვოლტის უპირატესობით მიმდინარეობდა და მან სტეკების გათანაბრებაც კი მოახერხა, მაგრამ ერთ-ერთ მნიშვნელოვან დარიგებაში მაკკიენმა დიდი უპირატესობის მოპოვება შეძლო: 562A8 ბორდზე გრინვოლტმა AA-ის 'სლოუფლეით' თამაში გადაწყვიტა. რივერზე გრინვოლტის ბეთს, 97-ით ჩასაფრებული მაკკიენის დიდი რირეიზი დახვდა. უმაღლესი სეტის პირობებში გრინვოლტმა მოწინააღმდეგის ველიუბეთი გადაიხადა, რამაც ტურნირის ბედი ფაქტიურად გადაწყვიტა. ტრევის გრინვოლტის უკანასკნელი 11 ბიგ ბლაინდი Q9-ის იმედად მაგიდის ცენტრში მოხვდა, მაგრამ ჯო მაკკიენის 77-ის წინააღმდეგ გაუმჯობესება ვერ შეძლო.