გასულ თვეში, პოკერის მოყვარულებს საშუალება მიეცათ იმ მოთამაშეთა სია შეედგინათ, რომლებიც 2017 წლის Poker Hall Of Fame-ში მოხვედრის მთავარი კანდიდატები გახდებოდნენ. რა თქმა უნდა, სახალხო სიყვარული ფილ აივის ხვდა წილად.

10 ნომინანტიდან, 8 უკვე აქამდეც ყოფილა პოკერის დიდების დარბაზში მოხვედრის კანდიდატი: ჰაკ სიდი, თორ ჰენსენი, დეივ ულიოტი, მაიკ მატუსოუ, დევიდ ჩიუ, ტედ ფორესტი, მაქს პესკატორი და მეტ სევიჯი უკვე რამდენიმე წლის განმავლობაში ცდილობენ Poker Hall of Fame-ის წევრებისა და ჟიურის მოხიბვლას. ამ სიიდან აღსანიშნავია დეივ ულიოტი - ლეგენდარული ბრიტანელი მოთამაშე, რომელიც ორი წლის წინ სიმსივნით გარდაიცვალა. მოთამაშეთა უმეტესობა თანხმდება, რომ დეივ ულიოტი, დიდების დარბაზში თუ მის გარეთ, პოკერის ისტორიაში ერთ-ერთ ქარიზმატულ ფიგურას წარმოადგენს. 

8 ნომინანტის გარდა, რომელსაც Poker Hall of Fame-ის ჟიური კარგად იცნობს, სიას კიდევ 2 მოთამაშე დაემატა: ფილ აივი და მორი ესკანდანი. ეს უკანასკნელი, გარდა იმისა, რომ აქტიური მოთამაშეა, რომლის ანგარიშზეც რამდენიმე ფინალური მაგიდა და $563.000 დოლარი ირიცხება, აზარტული სამყაროს გმირი სულ სხვა მიზეზით გახდა. თამამად შეიძლება ითქვას, რომ მორი ესკანდანიმ მნიშვნელოვანი წვლილი შეიტანა პოკერის აღქმაში, ახლებურ გაგებასა და თანამედროვე თამაშის ფორმირებაში. ის ისეთი გადაცემების პროდიუსერია, როგორებიც High Stakes Poker, Poker After Night და National Heads-up Poker Championship იყო. ესკანდანი აქტიურად თანამშრომლობდა ჰენრი ორნშტაინთან - ადამიანმა, რომელმაც შექმნა პოკერის მაგიდაში ჩამონტაჟებული კამერა, რითიც მოთამაშეების კარტების ნახვა გახდა შესაძლებელი. ამ გამოგონებამ და ცნობილმა სატელევიზიო შოუებმა, პოკერის ისტორიაში გარდამტეხი როლი ითამაშეს. 

რაც შეეხება ფილ აივის - ერთადერთი მიზეზი, რომლის გამოც ის Poker Hall of Fame-ის ნომინატთა სიაში ვერ ხვდებოდა, მისი ასაკი იყო. ერთ-ერთი მთავარი კრიტერიუმი, რომელსაც მოთამაშე უნდა აკმაყოფილებდეს, ასაკი - ის გადაცილებული უნდა იყოს 40 წელს. რა თქმა უნდა, დიდების დარბაზის წევრობა ფილ აივის გარანტირებული არ აქვს, მაგრამ ის ერთ-ერთი ყველაზე რეალური პრეტენდენტია. 40 წლის ასაკში მას WSOP-ის 10 ოქროს სამაჯური აქვს მოგებული. მისი სატურნირო კარიერა $24 მილიონ დოლარზე მეტს ითვლის, ხოლო მისი Full Tilt Poker-ის ექაუნთი, ონლაინ პოკერის ისტორიაში, ყველაზე წარმატებული ექაუნთია, $19 მილიონ დოლარიანი პროფიტით.