სავარაუდოდ, ჩვენი საიტის მკითხველი დაიღალა ნიუსებით სტივ ო'დუაიერის შესახებ, მაგრამ დანამდვილებით შეიძლება ითქვას, რომ მისი ოპონენტები გაცილებით უკმაყოფილოები არიან: ჰაი როლერ ტურნირების სპეციალისტმა კიდევ ერთი დიდი ღონისძიება - £10.000 MILLIONS UK High Roller მოიგო, £314.000 ფუნტ სტერლინგით პირველი ადგილისთვის.

ტურნირების ზედიზედ მოგება საკმაოდ იშვიათი მოვლენაა, მაგრამ ერთ კვირაში ორი ტურნირის გადაბმულად მოგება, მხოლოდ საუკეთესო მოთამაშეების ხვედრია. გასულ კვირას, ო'დუაიერმა £25.000-იანი ჰაი როლერი მოიგო და ბანკროლს £450.000 ფუნტ სტერლინგი დაუმატა. 

როგორც წესი, ჰაი როლერ ტურნირების ლაინ-აფი ხალხმრავლობით არ გამოირჩევა, მაგრამ ამ შემთხვევაში კოლორადოელ მოთამაშეს 105 მოთამაშიანი ფილდის დამარცხება დასჭირდა, რათა საკუთარი სახელი პოკერის გამოცემების ჰედლაინებში კიდევ ერთხელ გაეჟღერებინა. მან ისეთი მოთამაშეები ჩამოიტოვა უკან, როგორებიც მუსტაფა კანიტი, ანტონ უიგი და ადრიან მატეოსი არიან. ფინალურ ჰედს-აპში ჯანლუკა სპერანცას დამარცხებამდე, ო'დუაიერმა დომინიკ ნიცშე, მაიკ ჟანგი და პრებენ სტოკანი გამოთიშა თამაშს. 

ამ მომენტისთვის, მსოფლიოს ყველაზე შემოსავლიან მოთამაშეთა რეიტინგში სტივ ო'დუაიერი მე-11 პოზიციას იკავებს. ის მხოლოდ ნახევარი მილიონი დოლარით ჩამორჩება დევიდ პიტერსს, რომელმაც თავბრუდამხვევი წელი აჩვენა.