ლეგენდარულმა ონლაინ გრაინდერმა, ამჟამად ჰაი როლერ ტურნირების სპეციალისტმა - აიზიკ ჰექსტონმა $300.000 დოლარიანი Super High Roller Bowl მოიგო და მსოფლიოს ყველაზე შემოსავლიანი მოთამაშეების რეიტინგში მდგომარეობა 7 პოზიციით გამოისწორა.

ჰექსტონმა წარმატებას 36 მოთამაშიან ფილდზე მიაღწია და კარიერაში საუკეთესო ერთჯერადი ანაზღაურება - $3.672.000 დოლარი მიიღო. "ეს ჩემი ყველაზე დიდი მოგებაა, - ყვება Poker Central-თან საუბრისას ჰექსტონი, - უდაოდ, ჩემი საუკეთესო მიღწევაა, რაც ჩემი სატურნირო კარიერის მთავარ მომენტად ჩაითვლება."

ფინალური დღის ჩიპლიდერი აიზიკ ჰექსტონი იყო, რომელსაც სულ ცოტათი ჩამორჩებოდა სტივენ ჩედვიკი. ბრიტანელის მე-3 პოზიციიდან გამოთიშვის შემდეგ, ფინალური ჰედს-აპი ალექს ფოქსენსა და აიზიკ ჰექსტონს შორის გაიმართა, რომელიც მცირედ, მაგრამ კვლავ ჩიპლიდს ფლობდა. გარკვეული მომენტისთვის, ჰექსტონმა უპირატესობის 7:1-მდე გაზრდა მოახერხა. თამაშში არსებული ჩიპების ძირითადი ნაწილის მისაკუთრების შემდეგ, ჰექსტონის თამაში ბევრად აგრესიული გახდა: ერთ-ერთ ეპიზოდში მან KJ-ით ფოქსენის A8-ის წინააღმდეგ ოლ ინი გააკეთა. მართალია, ფოქსენმა ფლოპზე A-ის წყვილი მიიღო, მაგრამ იღბლის წყალობით, ჰექსტონმა 'რანერი' ორი წყვილი მოაგროვა და მეტოქეს უკანასკნელი ჩიპებიც წაართვა.

ამ მომენტისთვის, HandonMob-ის მონაცემებით, აიზიკ ჰექსტონის კარიერული სატურნირო მოგება $23.654.395 დოლარს შეადგენს. ყველაზე შემოსავლიან მოთამაშეთა რეიტინგში, მან მე-20-დან მე-13 ადგილზე გადაინაცვლა და ისეთი სახელები ჩამოიტოვა უკან, როგორებიც ჯეიკ შინდლერი, სკოტ სივერი, ჯეისონ კუნი, ფილ ჰელმუტი, ბრაიან რასტი, სემ თრიქეთი და მიკიტა ბადიაკოვსკი არიან. სწორედ ეს უკანასკნელი აღმოჩნდა $300.000 Super High Roller Bowl-ის ყველაზე უიღბლო მოთამაშე, რომელსაც ფულში შესვლამდე ერთი ადგილი დააკლდა.