გასულ კვირას, WPT-ის ცოცხალი ლეგენდის, დარენ ელიასის დაყაჩაღება მისმა ნაცნობმა, შენონ სოროკამ სცადა. საბედნიეროდ, ელიასი და მისი ოჯახი შეიარაღებული ყაჩაღობისას არ დაზარალებულან და უსაფრთხოდ არიან, დამნაშავე კი პოლიციამ დააკავა. 

21 მარტს, WPT-ის რეკორდსმენი, სერიების ოთხგზის გამარჯვებული - დარენ ელიასი მეუღლესთან ერთად სეირნობდა, როდესაც მის სახლში მისი მეგობარი, ასევე პოკერის მოთამაშე, შენონ სოროკა შეიჭრა. სოროკამ, იარაღის მუქარით, ელიასის შვილის აღმზრდელს ჯერ სახლის მეპატრონის სეიფის ჩვენება მოსთხოვა, შემდეგ ხელ-ფეხი შეუკრა და ოთახში ჩაკეტა. 19 წლის გოგომ ტყვეობიდან თავის დაღწევა შეძლო, სახლიდან გაიქცა და მომხდარის შესახებ პოლიციას აცნობა.

"ის ჩვენი გმირია. ჩვენ მასთან ვალში ვართ, - ამბობს დარენ ელიასის მეუღლე ბავშვის აღმზრდელზე, - ბედნიერები ვართ, რომ ამ კოშმარის გამო არავინ დაშავებულა."

შენონ სოროკა 24 წლის ფილადელფიელია, რომელიც ასევე პოკერით იყო გატაცებული. HandonMob-ის მონაცემებით, მის სატურნირო ანგარიშზე $37.745 დოლარის მოგებაა. ის ძირითადად $50-დან $100 დოლარამდე ღირებულების ტურნირებს თამაშობდა. დარენ ელიასის სახლი ნიუ ჯერსიში მდებარეობს, რაც არც ისე შორსაა სოროკას მშობლიური ქალაქიდან. "მან იცოდა ჩემი საქმიანობისა და შემოსავლების შესახებ, - ყვება ელიასი, - ალბათ, იფიქრა, რომ სახლში ძვირფასეულობას ან ფულს ვინახავდი."

ამჟამად, შენონ სოროკა ბარლინგტონის წინასწარი დაკავების იზოლატორში იმყოფება. მას ბრალად ედება იარაღის უკანონო შენახვა, ყაჩაღობა, ფიზიკური ძალადობა და ცეცხლსასროლი იარაღის გამოყენებით განხორციელებული მუქარა.