დენიელ ქეითსი არამხოლოდ წარმატებული მოთამაშეა, რომელსაც მილიონობით დოლარი აქვს მოგებული, არამედ - გულშემატკივრებისთვის ერთ-ერთი საინტერესო და სახასიათო პერსონა. რა თქმა უნდა, ისეთი მოთამაშის პირადი მოსაზრებების გაგება, რომელიც Bellagio-სა და მსოფლიოს სხვა კაზინოებში უდიდეს ქეშ-გეიმებში მონაწილეობს, ყველასთვის საინტერესო იქნებოდა. და აი, ის დღეც დადგა: პოკერის 30 წლის ვარსკვლავმა პირადი ბლოგის წარმოება დაიწყო. 

მისი პირველი ბლოგ პოსტი პრობლემას და მის აღმოფხვრას შეეხებოდა. ერთი შეხედვით, უცნაურია - რატომ უნდა დაიწყოს პროფესიონალმა პოკერის მოთამაშემ პრობლემებზე საუბარი? როგორც თავად ფიქრობს, პოკერში ჩართულ ადამიანს უამრავ პრობლემასთან უწევს შეხება და მათი ლიკვიდაცია და სწორი მიდგომის არჩევა განსაკუთრებულ მნიშვნელობას იძენს. 

მისი პირველი მაგალითი იმ წარმოდგენით იწყება, რომელიც პროფესიონალ მოთამაშეებზე იყო გავრცელებული. როგორც ქეითსი ყვება, რამდენიმე წლის წინ, საუკეთესო მოთამაშე სულ სხვა რამეს ნიშნავდა, მაგრამ იმ ეპოქაში, როცა Game Theory Optimal ყველამ ისწავლა, ყველაფერი თავდაყირა დადგა. პოკერის სამყარომ დიდი ცვლილებები გამოიარა და თუ წარსულში ყველამ იცოდა, ვინ იმალებოდა წარმატებული ონლაინ ექაუნთის მიღმა, დღეს პრივატულობა და ჩრდილში დგომა ბევრად სტანდარტული მოვლენა გახდა. 

ქეითსი შემდეგ პრობლემაზე ამახვილებს ყურადღებას: როგორ უნდა დააღწიოს მოთამაშემ თავი პოკერის მხოლოდ ერთი რაკურსიდან განხილვას ან პოკერის კონკრეტულ ასპექტზე ორიენტირებას? მართლაც, ხშირად, გემბლერისთვის იმის დაძალება, რომ საკუთარი თამაში და ზოგადად პოკერი განსხვავებული კუთხიდან აღიქვას იგივეა, რაც ადამიანს სთხოვო, რომ რელიგია შეიცვალოს.

დენიელ ქეითსის წამოწყებას ონლაინ პკოერის კიდევ ერთი ლეგენდა, ბრაიან ჰასტინგსი გამოეხმაურა და მისგან განსხვავებული, ალტერნატიული ხედვა გააჟღერა: "როგორც წესი, მე მომხრე ვარ, რომ მოთამაშე იმაზე იყოს კონცენტრირებული, რისი გაკონტროლებაც მას შეუძლია, ვიდრე ყველაფერს მოედოს და საბოლოოდ ყველაფერი უკონტროლო დარჩეს." 

ეთანხმები თუ არა ქეითსს - ობიექტური სიმართლე ისაა, რომ მეტი კამათი, დისკუსია და საკითხის ძირეული განხილვა მეტი შედეგის მომტანია, რაც პოკერის ისტორიაში ერთ-ერთ ყველაზე წარმატებულ მოთამაშეს უკვე გამოუვიდა.