მაიკ სექსტონის გარდაცვალება შოკისმომგვრელი ნამდვილად არ ყოფილა - მისმა მეგობარმა და, ასევე, Poker Hall of Fame-ის წევრმა, ლინდა ჯონსონმა, ტრაგიკულ მოვლენამდე რამდენიმე კვირით ადრე, ტვიტერის საშუალებით გვამცნო, რომ პოკერის ლეგენდა სიმსივნის ბოლო სტადიას საავადმყოფოს პირობებში ებრძოდა. 

მიუხედავად ამისა, მოთამაშეებს შორის სექსტონის გარდაცვალებამ ძლიერი ტკივილი გამოიწვია. მოვლენას არაერთი ცნობილი სახე გამოეხმაურა. ვეტერანმა კომენტატორმა და მოთამაშემ, მეტ სევიჯმა პოკერის ინდუსტრიის წარმომადგენლებს სექსტონის შესახებ მოგონებებისა და ფოტოების გაზიარებისკენ მოუწოდა: "მეგონა, რომ მაიკის სურათების ნახვა ტკივილს მომაყენებდა, მაგრამ პირიქით მოხდა. ვიხსენებ ძველ ამბებს და ვიცინი. ვფიქრობ, მაიკსაც ეს ენდომებოდა."

"დაუჯერებელია, - წერს 1998 წლის WSOP Main Event-ის გამარჯვებული, სკოტი უინი, - ძალიან მოგვენატრები, მეგობარო. სათამაშო მაგიდასთან და მაგიდის გარეთ, საუკეთესო იყავი!"

მოვლენას ვრცელი პოსტი მიუძღვნა პოკერის კიდევ ერთმა ლეგენდამ, ბარი გრინშტაინმა: "მაიკმა პოკერის რებრენდინგი შეძლო. ის პირველი იყო, ვინც ფართო მასებში აღიარება და პოპულარობა მოიპოვა. მართალია, ამ ფაქტმა მის სათამაშო კარიერას ხელი შეუშალა, მაგრამ ის WPT-ის წამყვანი და - შესაბამისად - პოკერის სამყაროს სახე გახდა."

"მაიკ სექსტონი პოკერის გიგანტი იყო, - წერს ფილ აივი, - ძალიან ცოტა ადამიანს თუ გაუკეთებია იგივე თამაშისთვის, რაც მან შეძლო. ვუსამძიმრებ მის ოჯახსა და მეგობრებს."

"კომენტატორი, მეგობარი და არაჩვეულებრივი ადამიანი, - ასე გამოეხმაურა სექსტონის გარდაცვალებას დენიელ ნეგრანუ და მასთან ერთად გადაღებული ფოტო გააზიარა, - ეს სურათი ჩემი და მაიკის 6 საათიანი ჰედს-აპის დაწყებამდეა გადაღებული, რომელიც მისი გამარჯვებით დასრულდა. იმ დღეს, ის წარმოუდგენელ ფორმაში იყო. მისმა თამაშმა ჩემზე დიდი შთაბეჭდილება დატოვა."

"მაიკ სექსტონი იყო სახელმძღვანელო, თუ როგორი უნდა ყოფილიყო მოთამაშე პოკერის მაგიდასთან და მის მიღმა, - ამბობს დოილ ბრანსონის შვილი და ლეგენდარული ქეშ-გეიმერი, ტოდ ბრანსონი, - ნამდვილი ჯენტლმენი, რომელსაც ყველამ უნდა მივბაძოთ. ის, ნამდვილად, პოკერის კულტურის ერთ-ერთი უდიდესი წარმომადგენელია."

US Poker-ზე სექსტონის გარდაცვალებას ფილ ჰელმუტიც გამოეხმაურა: "მაიკმა პოკერის სამყაროში და, ზოგადად, თამაშზე მნიშვნელოვანი კვალი დატოვა. პოკერი არც ასეთი დიდი და პოპულარული არ იქნებოდა მის გარეშე და არც მოთამაშეების რეპუტაცია და აღქმა შეიცვლებოდა დადებითისკენ. ჩვენ მის წინაშე დიდი ვალი გვაქვს."

სხვა ცნობილ მოთამაშეებთან ერთად, მაიკ სექსტონის ტრაგიკული ამბის გამო, მწუხარება კრის მორმანმა, დევიდ უილიამსმა, მაიკ მატუსოუმ, ადამ პლისკამ, მარია ჰომ და ფილ გალფონდმა გამოთქვეს.