ბოლო წლებში, უამრავი სატელევიზიო და ონლაინ გადაცემა გამოჩნდა, რომლებიც მაყურებელს პოკერის ქეშ-გეიმის ჩანაწერს ან პირდაპირ ტრანსლაციას სთავაზობდნენ. მათგან გამორჩეული Triton High Roller იყო, რომელზეც ფილ აივისთან და ტომ დუანთან ერთად, უმეტესად, აზიური პოკერის ვარსკვლავები, ან ჰონგ კონგელი ბიზნესმენები იყვნენ წარმოდგენილები. ასევე, საშუალება გვქონდა, გვენახა შედარებით დაბალბიუჯეტიანი ონლაინ სტრიმები, რომლებიც ახალი ქეშ-გეიმერების თამაშს ასახავდნენ. ყველაფერი კი, სავარაუდოდ, ორი დიდი გადაცემის ნოსტალგიით იყო გამოწვეული.

High Stakes Poker ტელეეკრანებზე 2006 წელს გამოჩნდა. 2003 წელს კრის მანიმეიქერის WSOP-ზე გამარჯვების შემდეგ, ESPN-ის გადაცემამ პოკერის ბუმის ახალი ტალღა გამოიწვია. მაყურებელს საშუალება ჰქონდა ისეთი მოთამაშეების დაპირისპირება ენახა, როგორებიც დოილ ბრანსონი, დენიელ ნეგრანუ, ბარი გრინშტაინი და ელი ელეზრა არიან. High Stakes Poker იყო პირველი გადაცემა, სადაც იმ დროისთვის ჯერ კიდევ უცნობი, მაგრამ იმედისმომცემი მოთამაშე - ტომ დუანი გამოჩნდა. ბარი გრინშტაინთან მისმა მილიონდოლარიანმა დარიგებამ დუანს დიდი აღიარება მოუტანა. 

სულ ცოტა ხნის წინ, ცნობილი გახდა, რომ ლეგენდარული გადაცემა სატელევიზიო ეთერს დეკემბერში, შობამდე დაუბრუნდება. ჯერჯერობით უცნობია, ვინ იქნება გადაცემის წამყვანი. რა თქმა უნდა, მოთამაშეები და წარმოუდგენლად მაღალი ლიმიტები მნიშვნელოვან როლს ასრულებდნენ, მაგრამ გადაცემის ერთ-ერთი მთავარი ხიბლი გეიბ კაპლანისა და ეიჯეი ბენზას კომენტარები იყო, რომლის დროსაც კაპლანი თავდაჯერებულ, ყოვლისმცოდნე გემბლერის როლს, ხოლო ბენზა - თამაშში ნაკლებადჩახედული მოყვარულის როლს ასრულებდნენ. წყვილის სპეციფიური იუმორი გადაცემას განსაკუთრებულ ელფერს აძლევდა. წამყვანების გარდა, ასევე უცნობია, თუ ვინ მიიღებს მონაწილეობას გადაცემის ახალ სეზონში. 

13 დეკემბერს, ტელეეთერს ასევე უბრუნდება Poker After Dark. ცნობილი მოთამაშეების მოწვევის გარდა, სატელევიზიო შოუმ იმითაც გაითქვა სახელი, რომ ის ეთერს არამხოლოდ ტეხასურ ჰოლდემსა და ქეშ-გეიმებს, არამედ ომაჰას და მინი სატურნირო სერიებსაც უთმობდა. როგორც ჩანს, WSOP-ის უღიმღამო საზაფხულო სერიის შემდეგ, რომელიც მთლიანად ონლაინ რეჟიმში გაიმართა, პოკერის გულშემატკივრებს საინტერესო და დაძაბული ზამთარი ელით.