შესაძლოა, მალე პოკერის ორი ყველაზე ამბიციური მოთამაშის დუელი ვიხილოთ. გასულ კვირას, ბრინ კენიმ საკუთარ ტვიტერზე ფილ ჰელმუტს მიმართა: "რა არის ეს 'თეთრი მაგია' და აგრესიული ტონი, რაც ჰელმუტისგან ისმის? ყველამ ვიცით, მეფე ვინც არის, მაგრამ თუ მაინც საუკეთესოებთან თამაში გინდა, მილიონი დოლარი დავდოთ და მივცეთ ხალხს ის, რაც სურს!" 

ბრინ კენი სატურნირო პოკერის ისტორიაში ყველაზე შემოსავლიანი მოთამაშეა. მის ანგარიშზე $56.5 მილიონი დოლარის მოგებაა. უნდა აღინიშნოს, რომ $20 მილიონი მან Triton Super High Roller-ზე მოიგო, რამაც მისი საერთო მოგება უპრეცედენტო მაჩვენებელზე აიყვანა. ამ ყველაფრის შემდეგ, გასაკვირი არ უნდა იყოს, რომ კენი საკუთარ თავს პოკერის მეფეს უწოდებს.

მეორე მხარეს კი ფილ ჰელმუტია, რომელსაც WSOP-ის 15 ოქროს სამაჯური აქვს მოგებული. მისი საერთო სატურნირო შემოსავალი $23 მილიონ დოლარს აღწევს. რა თქმა უნდა, ჰელმუტის ამბიცია, რომ ის ყველა დროის საუკეთესო მოთამაშეა, ყველასთვის ცნობილია. ჯერჯერობით, ვინც მის წინააღმდეგ გაბრძოლება სცადა, წარმატებას ვერავინ მიაღწია: ჰელმუტმა ანტონიო ესფანდიარის $350.000 დოლარი მოუგო, ხოლო დენიელ ნეგრანუს მის წინააღმდეგ გამართული პირველი მატჩი $50.000 დოლარი დაუჯდა. ამასთან ერთად, ჰელმუტს 2005 წლის National Heads-up Championship აქვს მოგებული, ხოლო 2013 წელს იგივე ტურნირის მე-2 ადგილი დაიკავა. 

კენის გამოწვევას ჰელმუტმა ასევე ტვიტერის საშუალებით უპასუხა: "ბრინ, შენ ძალიან დიდ პატივს გცემ. ვფიქრობ, რომ მართლაც შეგიძლია პოკერის საუკეთესო მოთამაშე გახდე. მაიკ მატუსოუ უკვე გთვლის ყველა დროის საუკეთესოდ. მაგრამ როცა ამბობ, რომ მაღალ ლიმიტებზე მანადგურებენ, რაც სიცრუეა, ვფიქრობ, რომ ეს შენი მხრიდან თავდასხმაა."

ბრინ კენიმ ფილ ჰელმუტის კიდევ ერთი სისუსტე იცის - საქველმოქმედო თამაშები. Poker Brat-ის გამოსვლის შემდეგ, მან ასეთი პოსტი გამოაქვეყნა: "ხალხი ფიქრობს, რომ აქ საკუთარი თავისთვის ვარ, ან რამის დასამტკიცებლად. თუ ჰელმუტი ჩემს შემოთავაზებას დათანხმდება, მე მოგების 100%-ს საქველმოქმედო ორგანიზაციებში გადავრიცხავ - $10.000 დოლარი 100 სხვადასხვა ორგანიზაციისთვის."

სანამ ჰელმუტი კენის შეთავაზებას დათანხმდება, მან დენიელ ნეგრანუს წინააღმდეგ მე-2 მატჩი უნდა ითამაშოს, რომელიც 5 მაისისთვისაა ჩანიშნული.