გასული წლის მაისში, რემკო რინკემამ თავისი ტოპ 10 მოთამაშე დაასახელა. თუ ვინმეს ეთქმის სიტყვა პოკერის სამყაროში, სწორედ რემკო რინკემაა. ის ვეტერანი ჟურნალისტია, რომელიც წლების განმავლობაში PokerNews-ის კონტენტის მთავარი რედაქტორი იყო, ამჟამად კი PokerGo-ის მედია მენეჯერია. მის მიერ დასახელებული ათეული ასე გამოიყურება:

1. ფილ აივი
2. სტუ ანგარი
3. ვიქტორ ბლომი
4. დენიელ ქეითსი/ფილ გალფონდი
5. ბენ სალსკი
6. ტომ დუანი
7. ჩიპ რიზი
8. დენიელ ნეგრანუ
9. ფედორ ჰოლცი
10. დოილ ბრანსონი

რინკემას ათეულს, მართალია, ერთი წლის შემდეგ, მაგრამ მაინც გამოეხმაურა დოილ ბრანსონი - ამ ათეულის ბოლო პოზიციაზე მყოფი და, სავარაუდოდ, პოკერის ისტორიაში ერთ-ერთი საუკეთესო მოთამაშე. 

"მოიყვანე ეს ნიჭიერი მოთმაშეები Bobby's Room-ში და ათამაშე ისეთ უნიჭოებთან, როგორებიც ბრაიან რასტი, სკოტ სივერი, დევიდ ოპენჰაიმი და სხვა რეგულარები არიან" - წერს ბრანსონი ტვიტერზე. აშკარაა, რომ რინკემას ათეულს ბრანსონი არ ეთანხმება. 

ფილ აივისთნ და სტუ ანგართან დაკავშირებით კითხვები არ ჩნდება: თანამედროვე პოკერში ჩართული ნებისმიერი მოთამაშე იტყვის, რომ მის მიმართ უდიდეს პატივისცემას გრძნობს; იგივე შეიძლება ვთქვათ სტუ ანგარზე, რომელმაც თავის ეპოქაში ყველაფერი მოიგო და ყველას მოუგო, მაგრამ საკუთარი ნიჭი ქაოტურ ცხოვრებაში გაფლანგა. 

მიზეზი, რატომაც ბრანსონმა Bobby's Room ახსენა შემდეგია: რინკემას ათეულში, თავად ბრანსონისა და ჩიპ რიზის გარდა, ყველა ის მოთამაშე იყო დასახელებული, ვინც სახელის ან ქონების მოხვეჭა ტურნირებით, ან ჰედს-აპ ქეშ-გეიმებით შეძლო. ბრანსონის აზრით, ამ სიას სწორედ რეალური ქეშ-გეიმერები აკლია, ვინც პოკერში გზის გაკვლევა დაუღალავი ბრძოლით და საუკეთესოთა წინააღმდეგ უმაღლეს ლიმიტებზე თამაშით შეძლო და არა საშუალო და დაბალი დონის მოთამაშეებთან ტურნირების მოგებით.