ახალი სატელევიზიო არხი, Poker Central, რომლის 24 საათიანი ეთერი მთლიანად პოკერს დაეთმობა, კიდევ ერთ მსოფლიო მასშტაბის პროფესიონალთან დებს კონტრაქტს. დენიელ ნეგრანუსა და ანტონიო ესფანდიარის, ამჯერად, ფილ ჰელმუტი უერთდება. Poker Central-ის თქმით, ჰელმუტთან დადებული კონტრაქტით, არხის მთავარი ტრიო შეიქმნა, რომელმაც უმნიშვნელოვანესი როლი უნდა შეასრულოს ტელევიზიის პოპულარობასა და წარმატებაში. მაუწყებლობის დაწყებამდე კიდევ 4 თვე რჩება, მაგრამ მიუხედავად ამისა, პოკერის მოყვარულთა წრეებში, მსგავსი სატელევიზიო პორტალის გაჩენამ, უკვე დიდი აჟიოტაჟი გამოიწვია. Poker Central-ის სტარტს მთელი პოკერის სამყარო ელოდება.

„ფილის ჩვენს გუნდში შემოსვლა, ძალიან კარგი მოვლენაა, - ამბობს Poker Central-ის აღმასრულებელი დირექტორი კლინტ სტინჩკომბი, - პოკერში, არცერთი დიდი საქმე არ გამოდის მის გარეშე.“

ჰელმუტის გარეშე არც წლევანდელი WSOP არ გამოვიდოდა, სადაც ამჟამად ლეგენდარული მოთამაშე მე-14 სამაჯურისთვის იბრძვის. „ძალიან მიხარია, ასეთი მნიშვნელოვანი როლის შესრულება რომ მიწევს Poker Central-ის ჩამოყალიბებაში, - თქვა ჰელმუტმა, - ძალიან სასიხარულოა ისეთი ტელევიზიის შექმნაში მონაწილეობა, რომელიც პოკერს მთელი მსოფლიოს მასშტაბით გააშუქებს.“

ჰელმუტი, ესფანდიარი და ნეგრანუ, მსოფლიოს უდიდეს პოკერის ვარსკვლავებად არიან აღიარებულნი. არაპროფესიონალმა, მოყვარულმა მოთამაშეებმაც კი უამრავი რამ იციან მათ შესახებ. ჰელმუტი კი, ამ სამეულიდან, ყველაზე განსხვავებული და უცნაური იმიჯის მქონე მოთამაშეა, რომელიც გამოირჩევა კონფლიქტურობით, ხმაურითა და სკანდალებით. თუმცა, მაგიდასთან ის ნამდვილ შოუს აწყობს, რაც მილიონობით ადამიანში აღტაცებას, გაბრაზებას, მხიარულებასა და ხალისს იწვევს.

სხვა უამრავ რეკორდთან ერთად, რომელიც ჰელმუტს პოკერში აქვს დამყარებული, ის ორივე კონტინენტის WSOP-ის მეინ ივენთის გამარჯვებულია, რაც ჯერ არავის გაუკეთებია.

პირველ ოქტომბერს ტელევიზიის გახსნასთან დაკავშირებით, Poker Central-მა სუპერ ჰაი როლერ ტურნირი დაგეგმა, რომელიც 2-4 ივლისს ჩატარდება და მისი ბაი ინი $500.000 დოლარი იქნება. ტურნირის ორგანიზატორები ვარაუდობენ, რომ პრაიზ პული $25 მილიონ დოლარს გადააჭარბებს, $8 მილიონი დოლარით პირველი ადგილისთვის. რა თქმა უნდა, ივენთი ‘ცენტრალური სამეულის’ გარეშე არ ჩაივლის - სამივე მათგანი თამაშშია!