უკვე მეორე წელია, რაც Poker Central ერთ-ერთ მასშტაბურ ტურნირს - Super High Roller Bowl-ს აწყობს. გასული წლის ღონისძიებაზე დასასწრები თანხა ნახევარ მილიონ დოლარს შეადგენდა. წელს კი, თანხა, $300.000 დოლარამდე შემცირდა. ივენთისთვის მხოლოდ 49 ადგილი იყო გათვალისწინებული, რომელთა უმეტესობა ტურნირის დაანონსებიდან რამდენიმე დღეში გაიყიდა. შეზღუდული ადგილების რაოდენობისა და ივენთის საპრიზო ფონდის გათვალისწინებით, რომელიც $15.000.000 დოლარს შეადგენს, ადვილი მისახვედრია თუ რამდენად ექსკლუზიურ ღონისძიებასთან გვაქვს საქმე. შესაბამისად, პოკერის ერთ-ერთ ყველაზე დიდ მოვლენას, მედიამ, ადეკვატური რეაქციით უპასუხა: ერთ-ერთი უდიდესი სპორტული სატელევიზიო არხი CBS, სუპერ ჰაიროლერის თასის გათამაშებას, საკუთარი ეთერის 30 საათს დაუთმობს. 

მართალია, რამდენიმე ტელევიზიამ შარშანდელი ტურნირიც გააშუქა, მაგრამ უმეტესად ეთერში ჩანაწერებიდან ამოჭრილი ეპიზოდები მოხვდა და თანაც რამდენიმეკვირიანი დაგვიანების შემდეგ. მაყურებელს კი ტურნირის სრული მსვლელობისა და რეალური თამაშისთვის თვალყურის მიდევნების საშუალება არ ჰქონდა. ივენთს, რომელიც 29 მაისიდან 1 ივნისამდე გაგრძელდება, CBS-ის ეთერში სამი დღის განმავლობაში 10-10 საათი დაეთმობა. ტურნირი, შარშანდელის მსგავსად, ლას ვეგასში, Aria Resort & Casino-ში გაიმართება. პირველი ადგილისთვის დაწესებული საპრიზო თანხა $5 მილიონ დოლარს შეადგენს. გასული წლის ღონისძიების გამარჯვებულმა, ბრაიან რასტმა $7.5 მილიონი დოლარი მიიღო. თუმცა, შარშანდელი ტურნირის ბაი-ინი $200.000 დოლარით აღემატებოდა წლევანდელს. 

როგორც ცნობილი გახდა, Poker Central, იმ მოთამაშეებსაც აძლევს ფულის მოგების საშუალებას, რომლებიც ტურნირში არ მონაწილეობენ. ამისთვის საჭიროა Poker Central-ის საიტზე გადასვლა, მარტივი სარეგისტრაციო ფორმის შევსება და სავარაუდო ფინალური შვიდეულის ზუსტი თანმიმდევრობით შედგენა. ვინც პირველ 7 მონაწილეს, შესაბამისი საპრიზო ადგილების მიხედვით გამოიცნობს, Poker Central-ის ადმინისტრაცია $1.000.000 დოლარს გადასცემს. რა თქმა უნდა, 49 მონაწილიდან ასეთი შვიდეულის შედგენა საკმაოდ რთულია. ამიტომაც, არხის ხელმძღვანელობამ, ყველაზე მიახლოებული სიის ავტორისთვის $10.000 დოლარი დააწესა.