ფედორ ჰოლცის პროფესიონალური კარიერის დასრულების მიუხედავად, მოთამაშის სახელი ახლო მომავალში კიდევ ერთხელ მოექცევა ყურადღების ცენტრში - ჰოლცი Kings' Casino-ში დაგეგმილ Celebrity Cash Kings-ის ივენთში მიიღებს მონაწილეობას. Celebrity Cash Kings მაღალი ლიმიტის ქეშ-გეიმების სერიაა, რომელიც 15 აგვისტოს აიღებს სტარტს და 2 დღე გაგრძელდება. ივენთის ფარგლებში რამდენიმე მაღალი, მაგრამ განსხვავებული ლიმიტის ქეშ-გეიმი იგეგმება, საიდანც ერთ-ერთის პირდაპირი ეთერით ტრანსლირება მოხდება. ტურნირს ჩეხეთში მდებარე ქალაქი, ევროპული პოკერის ერთ-ერთი უახლესი ცენტრი, როზვადოვი მასპინძლობს. 

ამ მომენტისთვის არსებული მონაცემებით, მთავარ მაგიდაზე, რომლის ტრანსლირებას ტელევიზიები გეგმავენ, ულიმიტო ჰოლდემის სესია გაიმართება, 50/100 ევროიანი ბლაინდებით. თუმცა, ორგანიზატორების გადაწყვეტილებით, მოთამაშეებს თავად შეეძლებათ პერიოდულად გადაერთონ პოტ-ლიმიტ ომაჰაზე და სურვილისამებრ გაზარდონ ბლაინდების მოცულობა. 

დადასტურებულ მონაწილეებს შორის, ფედორ ჰოლცთან ერთად, დენიელ ქეითსი, რობერტო რომანელო, ტობიას რეინმეიკერი, სემ ტრიკეტი და რობ იონგი არიან. რა თქმა უნდა, პოკერის ყვითელი პრესის მთავარი თემა ფედორ ჰოლცია, რომელმაც რამდენიმე თვიანი წარმოუდგენელი აპსვინგისა და $18.000.000 დოლარის მოგების შემდეგ, პროფესიონალური კარიერის დატოვება გადაწყვიტა. როგორც თავად ამბობდა, პოკერს ძალიან მცირე დროს დაუთმობდა, რომელიც ძირითადად WSOP-ის მეინ ივენთს, ან სხვა მნიშვნელოვან ტურნირს მოხმარდებოდა. მაგრამ პირველივე შესაძლებლობაზე, ჰოლცი დიდ თამაშში ჩაერთო.