პროფესიონალი მოთამაშეების ნაწილის აზრით Twitch-მა თანამედროვე პოკერი სრულად შეცვალა. პლატფორმაზე, რომელიც თავდაპირველად ვიდეო-გეიმერების მიერ გამოიყენებოდა, უამრავი გრაინდერი დარეგისტრირდა და საკუთარი თამაშების პირდაპირ ეთერში ტრანსლირება დაიწყო. ჯეიმი სტეპლსი Twitch-ის ერთ-ერთ ყველაზე პოპულარული არხის მფლობელია, რომელიც სრულად ეთმობა ონლაინ პოკერს. თუ პოკერის მოყვარულებს აქამდე წიგნებისა და სატელევიზიო გადაცემების იმედი ჰქონდათ, ახლა თამაშის ასათვისებლად ახალი ინსტრუმენტი - Twitch გაჩნდა, რომლის მეშვეობითაც რეალურ დროშია შესაძლებელი მსოფლიოს საუკეთესო მოთამაშეების ლაივ სესიებზე თვალის მიდევნება. 

როგორც ჩანს, მსოფლიო პოკერის ერთ-ერთი საუკეთესო მოთამაშე და ონლაინ პოკერის ლეგენდა, შვედი ვიქტორ Isildur1 ბლომი გულშემატკივრების გახარებას სწორედ პირდაპირი ეთერებით გეგმავს. მიუხედავად იმისა, რომ შვედი მოთამაშე 'ტვიტერზე' არც ისე აქტიურია, მისი ერთ-ერთი ბოლო 'ტვიტით' ირკვევა, რომ 'ისილდური' თამაშების ტრანსლირების შესახებ სერიოზულად ფიქრობს. "hotted89 (ალან ვიდმანი) ცდილობს პოკერის პირდაპირ ეთერში ტრანსლირებაში ჩამითრიოს. როგორ მოვიქცე?" -  წერს 'ტვიტერის' გვერდზე ბლომი. 

ბლომის უკანასკნელი სურათებით თუ ვიმსჯელებთ, ის ლონდონშია და დიდ დროს ატარებს 'ტვიჩის' ერთ-ერთ ყველაზე პოპულარულ სტრიმერთან და ვიდეო-გეიმერთან, ალან ვიდმანთან. უნდა ითქვას, რომ ალან ვიდმანს Unibet Poker ასპონსორებს. როგორც კულუარებიდან ხდება ცნობილი, სწორედ Unibet Poker აწარმოებს მოლაპარაკებებს ვიქტორ ბლომთან, რათა შვედმა მოთამაშემ მისი სამკლაურით ითამაშოს. ვიქტორ ბლომს სულ ორჯერ ჰყავდა დიდი სპონსორი: Amaya Inc-ის მფლობელობაში გადასული PokerStars, რომელთან დადებული კონტრაქტი ერთი წელიც კი არ გაგრძელებულა და რამდენიმეთვიანი ხელშეკრულება მკვდრეთით აღმდგარ FullTilt Poker-თან. თუ მოლაპარაკებები წარმატებით დასრულდა, ხანგრძლივი პაუზის შემდეგ ეს პირველი შემთხვევა იქნება, როდესაც ბლომი რომელიმე პოკერ-რუმის სამკლაურით ითამაშებს.