Aria-ში გამართულ ჰაი როლერ ტურნირებზე ტომ მარჩესი რეგულარულად ახერხებს ფულში შესვლას. როგორც ჩანს, ის არც Aria-ის გარეთ გრძნობს თავს ცუდად: ამერიკელმა პროფესიონალმა მოთამაშემ, $25.000-იან WPT-ის ჰაი როლერზე წარმოუდგენლად რთული ფინალური მაგიდა დაამარცხა და $432.000 დოლარი მოიგო. 

ტურნირი Luxor-ში მდებარე Esports Arena-ში გაიმართა. "აქ არაჩვეულებრივი ატმოსფეროა, - თქვა მარჩესმა, - მიხარია, რომ პოკერი სულ უფრო მეტი პოპულარობით სარგებლობს. ამაზე ისიც მეტყველებს, რომ პოკერის სათამაშოდ ახალი ადგილები ჩნდება." მოთამაშეებს რამდენიმეკვირიანი ლოდინი დასჭირდათ, რათა განახლებულ დარბაზში ეთამაშათ. დარბაზი Esports-ის წარმომადგენლებისთვის იყო განკუთვნილი და პოკერის ტურნირისთვის სახელდახელოდ მოამზადეს. 

ფინალური მაგიდის სტარტისთვის, მოთამაშეთა ნახევარს 35 ბლაინდზე ნაკლები ჰქონდა, რაც თამაშის ტემპს საკმაოდ აჩქარებდა. სამაგიეროდ, დევიდ პიტერსი - 200-იან, ხოლო ტომ მარჩესი - 131 ბიგ ბლაინდიანი სტეკს ფლობდნენ. მიუხედავად ჩიპლიდისა, პიტერსი მე-4 პოზიციიდან გამოეთიშა თამაშს და $135.000 დოლარიან მოგებას დასჯერდა. ტომ მარჩესს ისეთი რთული ლაინ-აფის გადალახვა მოუხდა, რომელიც რაინერ კემპეს, ჯეიკ შინდლერს, დევიდ პიტერსსა და სემ სოვერელს აერთიანებდა. მისი უკანასკნელი მეტოქე აარონ ოგუსი იყო. "აარონის თამაშს ყველაზე ნაკლებად ვიცნობდი, - თქვა ტურნირის დასრულების შემდეგ მარჩესმა, - ვეცადე, რაც შეიძლება ნელა მეთამაშა, რათა მისი სტილი უკეთ გამეგო." 

$432.000 დოლარიანი ანაზღაურება, მარჩესის კარიერაში რიგით მე-8 საუკეთესო შედეგია. "არ აქვს მნიშვნელობა რომელ ჰაი როლერს იგებ. განსაკუთრებულ შეგრძნებას თავად ტურნირის მოგება იწვევს და არა საპრიზო ფონდი. განსაკუთრებით ისეთ ტურნირებს ეხება, სადაც მედიის ყურადღება მნიშვნელოვნადაა გაზრდილი."