მომაჯადოებელი გარეგნობა, მანჩესტერის უნივერსიტეტის ხარისხი ასტროფიზიკაში, სამოდელო და სატელევიზიო კარიერა, პროფესიონალი მოთამაშის სტატუსი და 2 მილიონ დოლარზე მეტი კარიერული მოგება, - ლივ ბურე - მსოფლიო პოკერის ერთ-ერთი ნამდვილად გამორჩეული და მნიშვნელოვანი სახეა. 
ლივ ბურე დაიბადა 1984 წელს, ქალაქ კენტში, ინგლისში. იგი ცნობილი გახდა მის კარიერაში ერთ-ერთი მნიშვნელოვანი გამარჯვებით, როდესაც მან მოიგო 1.250.000 ევრო EPT სან რემოს მეინ ივენთზე. მისი კარიერა ითვლის ხუთ საპრიზო ადგილს EPT-ზე და ასევე თორმეტ საპრიზო ადგილს WSOP-ზე. ის არის პოკერსტარსის ერთ-ერთი სახე. 
ლივ ბურე პირველად პოკერ საზოგადოებაში გამოჩნდა 2005 წელს, სატელევიზიო გადაცემაში, სადაც ის მონაწილეობას ღებულობდა ოთხ სხვა მონაწილესთან ერთად. გადაცემის იდეა მდგომარეობდა იმაში, რომ პროფესიონალ მოთამაშეებს, ისეთებს, როგორებიც არიან ფილ ჰელმუტი, ენი დიუკი, დეივ "დევილფიშ" ულიოტი, მოემზადებინათ დამწყები მოთამაშეები პროფესიულ კარიერაში პირველი ნაბიჯების გადასადგმელად. ბურეს სატელევიზიო დებიუტმა გზა გაუხსნა მას, როგორც პოკერის სამყაროში, ასევე შოუბიზნესში. 2006 წელს იგი ჟურნალისტის რანგში მოგვევლინა, რომელიც აშუქებდა 37-ე WSOP-ის მიმდინარეობას. ის შეუერთდა Challenge TV-ის გუნდს, როგორც ინტერნეტ რეპორტიორი, ამზადებდა სიუჟეტებს EPT-ისა და WSOP ევროპული ივენთების შესახებ. 
როგორც უკვე ვთქვით ბურე ითვლის WSOP-ის 12 ფულში შესვლას, თუმცა ამ ტურნირის ევროპული ნაწილი მისთვის უფრო წარმატებული აღმოჩნდა. მისი საუკეთესო შედეგი WSOP-ზე არის 18-ე ადგილი, რომლისთვისაც მან 26.611 ევრო მიიღო. 

WPT არც ისე შედეგიანი აღმოჩნდა ბრიტანელი პროფესინალისთვის. აღნიშნულ ტურნირზე იგი მხოლოდ ერთხელ მოხვდა ფულში, 2009 წელს, როდესაც მან 37-ე ადგილი დაიკავა, რისთვისაც მან 40.855 დოლარი მიიღო. 

EPT ლივ ბურეს წარმატების პიკად შეიძლება ჩავთვალოთ. პირველი აღიარება მან სწორედ ამ ტურნირის მეშვეობით მოიპოვა 2010 წელს, როდესაც 1240 მოთამაშეს შორის საუკეთესო აღმოჩნდა და პირველი ადგილი მოიპოვა. ამ გამარჯვებით ბურემ მოიპოვა ადგილი საუკეთესო ქალ მოთამაშეებს შორის და გახდა ერთ-ერთი წარმატებული და ცნობილი პოკერის სახე მსოფლიოში. 
ლივ ბურემ პირველი მნიშვნელოვანი ტურნირი მოიგო 2008 წელს, European Ladies Championship, რომლის პირველი ადგილიც 42.000 დოლარს ითვალისწინებდა. 
ბურეს პირველი მნიშვნელოვანი კონტრაქტი გაფორმდა 2008 წელს "Absolute Poker"-თან და იგი წლის განმავლობაში წარადგენდა ერთ-ერთ უდიდეს გრანდს. 2009 წლის აგვისტოში ის გახდა Ultimate Bet-ის პროფესიონალთა გუნდის წევრი, ხოლო 2011 წლიდან ბურე საზოგადოებაში წარადგენს PokerStars-ს, რომელიც დღემდე გვევლინება მოთამაშის მთავარ სპონსორად. 

ლივ ბურე გატაცებულია როკ მუსიკით, შესანიშნავად უკრავს გიტარაზე, ხოლო მისი პოკერსტარსის ნიკი ბევრისთვის საყვარელი ჯგუფი, - Iron Maiden-ია.