2017 წლის WSOPE-ის მეინ ივენთის გამარჯვებული 888Poker-ის საკვალიფიკაციო ტურნირის გამარჯვებული, ესპანელი მარტი როჰა დე ტორესი გახდა, რომელმაც €1.115.207 ევროს მოსაგებად, სულ რაღაც €220 ევრო დახარჯა. 

ფინალური დღე ტელეწამყვანისა და პოპულარული მოთამაშის, მარია ჰოს ჩიპლიდით დაიწყო. მის გამარჯვებას უამრავი ონლაინ გამოცემა წინასწარმეტყველებდა, მაგრამ ჰოსთვის დღე არნახულად წარუმატებელი აღმოჩნდა, რამაც მთელი მისი სტეკი შეიწირა. მან ჯერ KQ-ით, დე ტორესის QQ-ის წინააღმდეგ წააგო, შემდეგ კი 22-ით უთანასწორო ბრძოლაში ნაილ ფარელის JJ-ის დაუპირისპირდა და საბოლოოდ, მისი სტეკი 7.5 მილიონიდან 1.5 მილიონამდე შემცირდა. 

მარია ჰო და ნაილ ფარელი, რამდენიმე დარიგების შემდეგ, ერთდროულად გამოეთიშნენ ტურნირს, როცა ჰოს AJ-ით გაკეთებულ ოლინს, ფარელმა KK-ით, ხოლო მომავალმა ჩემპიონმა AA-ით უპასუხეს. 

ფინალური ჰედს-აპი იტალიელი მოთამაშის, ჯანლუკა სპერანცას მასიური ჩიპლიდით დაიწყო. მალე, მისი უპირატესობა 22 მილიონამდე გაიზარდა, დე ტორესის 4.4 მილიონის წინააღმდეგ. თუმცა, გარკვეული პერიოდის შემდეგ, სტეკები თითქმის გათანაბრდა. საბოლოოდ, ყველაფერი დიდი შერკინებით დასრულდა: დე ტორესმა მთლიანი სტეკი, რომელიც იტალიელისას თითქმის უთანაბრდებოდა, მაგიდაზე 55-ის იმედად შეიტანა. სპერანცამ მოწინააღმდეგის აგრესიას AJ-ით უპასუხა. A93 ფლოპზე, თითქოს ყველაფერი დასრულებული ჩანდა, მაგრამ თერნზე დადებულმა 5-მა ყველაფერი შეცვალა. შემდეგ დარიგებაზე, იტალიელმა დარჩენილი რამდენიმე ბიგ ბლაინდი მაგიდის ცენტრში მოათავსა და ესპანელთან კიდევ ერთხელ დამარცხდა. მარტი როჰა დე ტორესმა კი პოკერის ისტორიაში ერთ-ერთი დასამახსოვრებელი და შთამბეჭდავი გამარჯვება მოიპოვა.